🌱माझा परिचय🌳: सौ. कमल उत्तम सोनजे : मराठी लेखिका व कवयित्री

             माझे नाव सौ.कमल उत्तम सोनजे.माहेरचे नाव कमल लक्ष्मण खाडे.माझा जन्म एका शेतकरी कुटुंबात झाला.माझे आई-वडील फक्त निरक्षर होते पण बाकी ते सर्व गोष्टीत अतिशय हूशार आणि, फार कष्टाळू होते.आम्ही एकूण दहाजण बहिण भाऊ होतो.पण आम्हाला आई-वडिलांनी उत्तम प्रकारचे संस्कार दिले आहेत.

            मी सर्वांत लहान आहे. मी दोन तीन महिन्यांची असतानाच वडील वारले.त्यानंतर आई आणि मोठी बहीण भाऊ माझे पालक झाले.घरात सर्वजण मोठे असल्याने मित्र-मैत्रिणी कुणीच नव्हते.त्यामुळे गाईची वासरे,बकऱ्या, कोंबड्या, फुलझाडे हेच माझे सवंगडी झाले.दिवसभर त्यांच्याशी खेळणे,गप्पा मारणे यातच दिवस आनंदात जात असे.निसर्गातील सर्व ऋतु जवळून पाहिले,अनुभवले, त्यातील निरनिराळे बदल,बहर सर्व पहातांना मनाला अतिशय आनंद होत असे.शाळेत निबंध लिहायला सांगितला तर मी खूप खूप सुंदर लिहायचे.माझा निबंध वर्गात वाचून दाखवायचे,गुरूजी, बाई, नंतर मॅडम! आणि मग माझी लिहिण्याची आवड वाढतच गेली.सोळा वर्षांची झाले आणि आईच्या हट्टी आग्रहामुळे माझे लग्न करण्यात आले.संसाराची स्वप्न काय असतात?आपला आयुष्यभराचा जोडीदार कसा असावा?याची काहीसुद्धा अक्कल नसतांना लग्न होऊन पुण्यात आले.दहा बाय दहाच्या खोलीत दोन दिरांसह माझा संसार सुरू झाला.जेंव्हा स्वतःचेच नीट काही करता येत नव्हते, तेंव्हा मी चार लोकांचे सर्व काम करत होते.आणि तरीसुद्धा जसा वेळ मिळेल तसे वाचन लिखाण मी करीत होते.

            संसारातील कर्तव्ये पार पाडून लिखाणाची आवड जोपासत होते.कुठेही लिखाण पाठविले तरी बक्षिस हमखास मिळत होते.लिखाण आणि काव्य माझे आवडते छंद आहेत.आणि ते मी खूप मनापासून जोपासते.मला अगणित पुरस्कार मिळाले आहेत.मी सुरूवातीचे पुरस्कार नीट सांभाळलेसुद्धा नाहीत.मी फक्त आठवी पास आहे.पण पहिली ते आठवी कायम प्रथम क्रमांकाने उत्तीर्ण होत होते.आम्हाला सातवीला केंद्र परीक्षा असायची.मी संगमनेर केंद्रात दूसरी आणि शाळेत पहिली आले होते.१९६९साली माझे कार्यक्रम पुणे आकाशवाणीवर लागले होते.मला फक्त आठवीला एक वर्षच इंग्रजी होते.तरीसुद्धा मी एस,नो, थॅंक्यु आणि वेलकम या चार शब्दांच्या मदतीने चार वेळा अॉस्ट्रेलियाला मोठ्या मुलाकडे जाऊन आले.एकटीच! अणि मोठ्या भावाच्या आग्रहाने चार वेळेच्या प्रवासाचे वर्णन लिहिले त्याचे पुस्तक छापले, नाव दिले"माझी अॉस्ट्रेलियाची सफर"भाग १/२/३/४सिंदबादच्या सात सफरी,तशा कमलच्या चार सफरी.माझा मोठा मुलगा अॉस्ट्रेलियाला गेला,मधला एम,एस, करण्यासाठी अमेरिकेत गेला.आणि त्याचवेळी धाकटा क़ंपनीच्या‌ ट्रेनिंगसाठी बेंगलोरला गेला.

            फक्त मुलांमध्येच गुरफटणारी मी, एकदम एकाकी झाले.पती सोबत होते,पण मुलांच्या विरहाने एवढे दुःखी होणे त्यांना पसंत नव्हते.ते त्यांचे तरूणपण एन्जॉय करीत होते.आणि मी कल्पनेच्या दुनियेत जाऊन मुलांना भेटत होते.आणि त्यातूनच तयार झाल्या माझ्या कविता!

            असे लिखाण आणि काव्य हे माझे मुख्य छंद म्हणजे माझ्या जगण्याचा श्वास आणि ध्यास आहे.त्यातच मला खूप आनंद आहे.त्यामुळेच मला लिहावेसे वाटते की,रम्य ते बालपण माझेच होते, आणि आता रम्य ते म्हातारपण सुद्धा माझेच आहे.खरे तर हा माझा अगदी अल्प परिचय आहे.गागरमे सागर भरण्याचा प्रयत्न केला आहे.तरी गोड गोड मानून घ्यावा ही विनंती!👏

सौ.कमल सोनजे पुणे🙋‍♂